آیریلیق چاغیندا گولور گوزلرین

بیلیرسن قورتولور یاخان الیمدن

ایندی کی گئدیرسن سوزوم یوخدی گئت

آللاها تاپشیردیم چئخماز دیلیمدن

آیریلیق چاغیندا اللرین دئییر

داها سالماگینان قولون قولوما

سنلن منیم سویوم گئتمیر بیر آرخا

سن گئت اوز یولونا من اوز یولوما

من ازل گوروشده بونو دوشوندوم

اللرین الیمده قالمایاجاقدیر

گوزلرین دئدیلر سنده اولان عشق

کولگه سین باشیما سالمایاجاقدیر

دئییردین سنله من تای توش دگیلیق

اوزونده بیلیردین چوخودوم سنه

دیلین دوتولموشدی سوز تاپانمادین

نصرتین شعرینی اوخودوم سنه

" گئتمک ایسته ییرسن نه دانئش نه دین

یوخ اول اوزاقلار تک دوماندا چن ده

نه ییمی سئومیشدین دئییه بیلمه دین

ایندی سه یوز عاییب گورورسن من ده"

پاییز آخشامیدیر چنلی بیر یولی

سن گئدیردین منی قَهَر بوغوردی

منیم اولموش عشقیم سنین هوسین

اوره گینده آیری سئوگی دوغوردی

بیلمیرم بو قوشلار نه دئییر منه

آنجاق بیلیرم کی اوچوب گئدیبسن

من بیر دوشرگه یدیم سنین یولوندا

بیر گون قوناقیدین کوچوب گئدیبسن

من دردیمی دئدیم کوچن قوشلارا

اولار بو سوزلری سنه یئتیرسین

هله ده قاییدسان گوزوم اوسته سن

بلکه سونکی بارا بره بیتیرسین

 *****

آما منیم چارام آغلاماق دگیل

ایندی آییلمیشام تاپارام سنی

آی منیم هجریم قوچاق نبی تک

ائللر آراسیندا قاپارام سنی

خان چوبان دگیلم دوشم چوللره

قویمارام کوهنه لده زامان یارامی

آند اولسون آنامدان امدیگیم سوته

آلارام سئللردن بیر گون سارامی

                  (۱)

نه دست تو را گرفت دست سردم

نه نام تو را سر زبان آوردم

اما تو به هر کسی رسیدی گفتی

آمد به سراغم و جوابش کردم

            (۲)

هر وقت لبش را به لبم می دوزد

بیچاره دلم وسوسه می آموزد

هر چند که مثل او نبودم عاشق

آتش چو گرفت خشک و تر می سوزد